Fotographien vun dat Atelier un den Verlag August Mencke & Co, Wandsbek bi Hamborg

• Karton, üm 1880, 50 cm wied

Mencke un siene Lüüd maken an dat Enn‘ vun dat 19. Johrhunnert in ein poor Johren in dat heile Düütschland so väle fotographisch‘ Upnahmen vun Schlötter un Herrenhüüser, oewer ok vun anner Hüüser in Stadt un Land, dat sei binah nich tau tellen sünd. De Biller warden in dat Kontaktverfohren makt un sünd äbenso grot as de Negative. Sei warden enkelnt orrer in Mappen verköfft. Nah dat, wat ‘n hüüt weit, dücht dat so, as wenn sei mit de Upnahmen meist in Mäkelborg taugang wieren.

Näben de Stiftung Mäkelborg hett ok dat Landeshauptarchiv Schwerin bannig väle Fotographien vun A. Mencke & Co.
De Stiftung hett tau‘n Anfang vun de 2000er Johren so bi 250 Fotographien vun privat köfft. Sei sallen vörher up ein Dackboehn vun ein Pfarrhuus lagert hebben. De Biller sünd vun Bedüden, wenn ein de Läbenswelt up‘t Land an‘t Enn vun dat 19. Johrhunnert verstahn will.