Frans van Mieris d.Ä., Dam an ein Cembalo

• 1658, Öl up Holt, 31,6 cm hoch

Ierst vun 1732 an, as hei kaiserlichen Administrator vun dat Herzogtum wier, fangt Christian Ludwig an, Kunst tau sammeln. Dat wiest, dat hei nich ut Passion sammelt, sünnern dat hei sick Mäuh gifft, siene Machtstellung dörch Repräsentatschion Kraasch tau gäben. Hei is de jüngere Brauder vun den Herzog Carl Leopold, de twors regiert, oewer nix tau seggen hett. Dat hei repräsentiert, hüürt för em as Rieksfürst tau den gauden Ton. Un hei fangt mit einen Trummelslag an: hei köfft dit Bild vun Frans van Mieris d.Ä., de tau disse Tied bannig fieert wüür.

De Ankoop is up den Prick vörbereit‘ un hei is de düerste vun siene Sammlung. 3.000 Gulden, so bi 1.500 Rieksdaler, kost em „de Kron“ , de hei „ut Holland entführt“. Dorför sünd de annern, de dit Bild giern harden, iewersücksch un afgünstig, as dat allens de Kamerdeinstmann van Haften ut Den Haag mellt.
As dat niege Bild in Mäkelborg ankümmt, gifft dat noch‘n Drama, denn Carl Leopold makt grad ‘n Buernupstand gägen den jüngeren Brauder. So kümmt dat Bild tauierst in dat schwed‘sch-pommersch Barth. Ierst twei Johre dornah kann Christian Ludwig in dat Schlott vun siene Vöröllern in Schwerin intrecken.