Segel orrer Petschaft vun Albert von Bertekow

Missing, üm 1300,
5,7 cm hoch
(utleihnt vun dat Lannesamt för Kultur- un Denkmalplääg Mäkelborg-Vörpommern)

Dat Segel orrer de Petschaft ut Missing is bi den Ümbuug vun den Kirchhoff vun St. Marien in Pasewalk funnen wuurn. Dat wüür ut ein Keller vun de Kirchenbaudenreihg utgrawt, de vull Brandschutt wier. So’ne Segel ut dat Middelöller tau finnen, kümmt nich väl vör. So grot as dat is un as dat Segel utsüht mit dat Wappen un den Potthelm, möt dat woll so üm 1300 makt sien. De Segel orrer Petschaften vun de Ridderslüüd wieren meist rund orrer sehgen ut as’n Schild. Dit hier süht oewer ut as’n Spitzei. Dat hangt dormit tausamen, dat de Besitter Verwandtschaft bi de geistlichen Würdendräger harr. Dat Segel wiest ‘ne Ümschrift in gotische Grotbaukstaben:  S[IGILLUM] ALBERTI MILITIS DE BERTECOV. Dat is de Nam vun den Besitter un in de Midd is dat Wappen vun de Familie Bertekow. De Linien, de de Baukstaben verbinnen (Serifen) seihn ut as lütte Krüüze. Tau kennen is ein dreikantigen Wappenschild, de so’n lütt beten nah rechtsch steiht. Ok ein Balken, de beten nah rechtsch steiht un drei Rosen sünd tau kennen. Doroewer is ‘n Potthelm, de nah vörn kiekt. Up den Helm steiht Helmschmuck in de Höcht (lütte Fahn/Feddern) un noch Büffelhüürn. De Städen twüschen de Baukstaben un dat Wappen is vull mit lütte Stierns un Rosen.

Up de Achtersiet is’n lütt Steg anbröcht, so dat de Besitter ‘n Ledderband orrer ‘ne Kett antüdern kunn, üm dat Segel ümmer mittaunähmen. De Riddersmann Albert vun Bertekow stammt vun ein Riddergeschlecht ut den Nuurden vun Stendal in de Ollmark ut dat Dörp Bertekow. In de Urkunnen stahn de Bertekows all in dat 13. Johrhunnert so in, dat sei wegger sünd un wat harden. An den 17. Dezember 1296 warden de Riddersmann Albert tausamen mit siene vier Bräuder in ein Urkunn as Tüügen nömt. Dat kann angahn, dat de Ridder Albert vun Bertekow all fast wahnt hett. Kann oewer ok angahn, dat hei tau de Lüüd hüürt hett, de de pommerschen Herzög ümmer nahfolgt sünd. Dat dat Segel in Pasewalk funnen is, wiest woll dorup, dat hei dor Familie hatt hett. Is nich klor, worüm dat Segel heil bläben is, denn eigentlich iwer dat so, dat ‘n Segel nah den Dod vun den Besitter kaputt makt wüür, so dat dat nich mieh tau bruuken wier.

vörwards

Text: A. H.

Dit Utstellungsstück hüürt tau:

Vörpommern bet 1945

Dat Originalutstellungsstück finnst du hier:

Museum der Stadt Pasewalk - Künstlergedenkstätte Paul Holz

Museum der Stadt Pasewalk - Künstlergedenkstätte Paul Holz

Prenzlauer Str. 23
17309 Pasewalk


museum@pasewalk.de

www.pasewalk.de