Kapsel för de Urkunn in den Grundstein vun de Langen Strat in Rostock

Papp, Rostock, 1953

Disse Kopie vun de Kapsel un de Urkunn ut den Grundstein ünner de Langen Strat vun Rostock hett dat Rostocker Museum tau’n Andenken an den Upbuug vun de Stadt tau DDR-Tieden krägen. 1950 ward Rostock dörch dat Upbuuggesetz, so as ok acht anner Städte, tau ‘ne „Upbuugstadt“ makt. De Architekten mößten sick ‘n Ogenspeigel nähmen an de sowjetischen „Grundsätz‘ för’n Stadtbuug“, dat güng allens nah dissen Plan. Dacht wüür tauierst de Platz in de Midd twüschen Kröpelin’schen Duur un Stadthaben. Vun dor ut süll de Lange Strat as Magistrale dissen Platz mit den niegen Markt verbinnen. 1952 hett de DDR-Regierung dat denn ok binah so beschlaten. De Lange Strat wüür as „ierste sozialistische Strat vun Rostock“ anseihn.

För den Buug hebben sei den trechtmakten Entwurf vun Joachim Näther as Grundlag nahmen. Hei hett sick ‘n Ogenspeigel an de berlin’sche Stalinallee nahmen. Up dat Stadtbild un de historischen Straten ward oewerhaupt nich miehr acht‘. De ollen Deile vun de Langen Strat, de noch dor wieren un dat niege Seefohrtsamt warden afräten. An den 30. Januar 1953 ward de Grundstein leggt. Dat Politbüro vun de SED orren’t an, dat de Strat up 60 Meter breider makt un dat an de Ennen Hüüser mit’n Torm tau stahn kamen. In’n August 1953 is de Ministerrat för de  Plän vun’n Platz in de Midd. Nah den 17. Juni 1953 gifft dat ok miehr Kritik an dat Nationale Upbuugprogramm un ok doran, dat de historischen  Innenstädte kaputt makt wüüren. Dorüm ward de grote Plan 1956 upgäben. 1959 fallen oewer liekers de letzten Giebelhüüser an de Nordsiet vun’n Markt. 1960 ward de Rest vun de St. Jakobi-Kirchenruin kaputt makt, de ünner Denkmalschutz stünn.

vörwards

Text: S. St.

Dit Utstellungsstück hüürt tau:

Mäkelborg-Vörpommern

Dat Originalutstellungsstück finnst du hier:

Kulturhistorisches Museum Rostock

Kulturhistorisches Museum Rostock

Kloster zum Heiligen Kreuz
Klosterhof 7
18055 Rostock

kulturhistorisches.museum@rostock.de

www.kulturhistorisches-museum-rostock.de