Ernst Barlach: Klosterschäuler, de läsen deit

Ernst Barlach (1870–1938) Klosterschäuler, de läsen deit, 1930, Holt (Eik), 114,8 cm hoch

De Klosterschäuler, de läsen deit is ‘ne bannige Holtfigur, de Indruck makt. Dat wiest ok Barlach siene Verbinnung tau de middelöller‘sch Figurenkunst. As hei sülwst seggt hett, fäuhlt hei sick as ein, de arbeiten deit, as ein Bildschnieder in dat Middelöller, vör allem as de in Nuurddüütschland un üm de Ostsee ‘rüm. So schrifft hei all 1909: „Un gotisch Holtfiguren sünd för mi einfach ‘ne Apenborung.“ De Figur vun den Apostel Johannes vun 1430 ut den Dom tau Güstrow wier Barlach fürwiß bekannt, denn sei is in de Kompositschion un ok vun sien Bedüden her den Klosterschäuler ähnlich. Ernst Barlach gellt as de, de Holtfiguren in dat 20. Johrhunnert ganz un gor nieg dacht hett. So bi 100 Figuren ‘rüm vun all siene Warke, dat is ein Vierdeil, hett hei ut Holt makt. Hei hett ‘ne sünnerbore Oort un Wies funnen, dat Holt tau schnieden. Hei arbeit‘ sei ut einen Holtkloben rut. So strahlen de Figuren Rauh un Fastigkeit ut.

De boebelste Schicht bearbeit hei denn wedder so fien, dat dat Licht sick dorup malerisch speigelt. Dordörch ünnerscheiden sick disse Figuren ok ganz un gor vun de, de anner expressionistisch Künstlers makt hebben, so as Ernst-Ludwig Kirchner orrer Erich Heckel ehre.
Barlach makt sienen Klosterschäuler, de läsen deit 1930 för den Güstrow‘schen Fabrikanten Richard van Tongel. De wull eigentlich ‘ne Figur hebben, de up dat Schapp sitten süll, wo hei siene graphischen Blädder in uphägen wull.
Ofschonst de Nationalsozialisten Barlach all nah 1933 verfolgen daun, ward de Klosterschäuler, de läsen deit 1934 up de Weltutstellung in Chicago wiest. Hüüt is hei dat Hart vun de Gertrudenkapell in Güstrow, de siet 1953 Museum för Ernst Barlach is.

vörwards

Text: V. P.

Dit Utstellungsstück hüürt tau:

Mäkelborg bet 1945

Dat Originalutstellungsstück finnst du hier:

Ernst Barlach Stiftung Güstrow

Ernst Barlach Stiftung Güstrow

Heidberg 15
18273 Barlachstadt Güstrow

office@barlach-stiftung.de

www.ernst-barlach-stiftung.de